Nënshkruhet marrëveshja për kyçjen e 300 ekonomive familjare në rrjetin e ujësjellësit në Hogosht

Kryetari i Komunës së Kamenicës, Kadri Rahimaj, së bashku me Drejtorin e DSHPAIE-së, Zotrim Kastrati, kanë pritur në takim Kryeshefin Ekzekutiv të KRU “Hidromorava” Sh.A. Gjilan, Ymer Salihun si dhe Menaxherin e Njësisë së KRU “Hidromorava” në Kamenicë, Sherif Thaqin.

Gjatë këtij takimi, Kryetari Rahimaj dhe Kryeshefi Ekzekutiv Salihu kanë nënshkruar Marrëveshjen e Mirëkuptimit për instalimin e kyçjeve shtëpiake në rrjetin e ujësjellësit për fshatin Hogosht.

Qëllimi i kësaj marrëveshjeje është instalimi i kyçjeve shtëpiake në sistemin e rrjetit të ujësjellësit për banorët e fshatit Hogosht, nga kompania e licencuar nga Autoriteti Rregullator për Shërbimet e Ujit (ARRU).

Kryetari Kadri Rahimaj ka thënë se kjo marrëveshje përbën një hap shumë të rëndësishëm drejt përmirësimit të furnizimit me ujë për banorët e Hogoshtit.

“Bashkë me Kryeshefin Ekzekutiv të KRU ‘Hidromorava’, Ymer Salihun, kemi nënshkruar marrëveshjen për instalimin e kyçjeve shtëpiake në rrjetin e ujësjellësit në fshatin Hogosht. Në kuadër të këtij bashkëpunimi do të realizohet kyçja e 300 ekonomive familjare në rrjetin e ujësjellësit, në vlerë prej 80 mijë eurosh. Kjo marrëveshje shënon fillimin e një bashkëpunimi të rëndësishëm që do t’u mundësojë banorëve të Hogoshtit qasje më të lehtë në shërbimin e ujësjellësit. Ne do të vazhdojmë të punojmë çdo ditë për të plotësuar nevojat e qytetarëve në secilin lokalitet”, ka thënë Kryetari Rahimaj.

Edhe Kryeshefi Ekzekutiv i KRU “Hidromorava”, Ymer Salihu, theksoi se kjo marrëveshje konfirmon bashkëpunimin e mirë me Komunën e Kamenicës, me synim përmirësimin e infrastrukturës ujore dhe rritjen e cilësisë së shërbimeve për konsumatorët. /2LONLINE/