Nënkryetarja e Kamenicës mirëpret në takim përfaqësues të Swisscontact

Nënkrytarja e Komunës së Kamenicës, Arta Bajralija së bashku me Zëdhënësen e Komunës Lidiona Marovca, kanë pritur në takim përfaqësuesit e Swisscontact Florije Kryeziu, Mirishahe Syla, Lulzim Krasniqi e Blerina Batusha-Xërxa.

Takimi u zhvillua në kuadër të fazës fillestare të projektit Përfshirja e Grave për Rritje dhe Qëndrueshmëri (Women’s Inclusion for Growth and Sustainability – WINGS), i financuar nga Agjencia Zvicerane për Zhvillim dhe Bashkëpunim (SDC).

Ky takim është mbajtur me qëllim identifikimin e sfidave dhe mundësive që ndikojnë në rritjen e pjesëmarrjes së grave në tregun e punës, si dhe diskutimin e politikave dhe iniciativave që kontribuojnë në fuqizimin ekonomik të grave.

Me këtë rast, Nënkryetarja Bajralija prezantoi angazhimin e Komunës së Kamenicës në krijimin e mundësive të barabarta për gratë dhe vajzat, duke theksuar se përfshirja e tyre në jetën ekonomike është një faktor kyç për zhvillimin e qëndrueshëm të komunës.

Nga ana tjetër, përfaqësuesit e projektit vlerësuan gatishmërinë e Komunës për bashkëpunim dhe theksuan rëndësinë e kontributit të institucioneve lokale në hartimin e politikave dhe masave që nxisin punësimin dhe fuqizimin ekonomik të grave.

Komuna e Kamenicës mbetet e përkushtuar të bashkëpunojë me partnerët vendorë dhe ndërkombëtarë për krijimin e një mjedisi gjithëpërfshirës, ku gratë dhe vajzat kanë mundësi të barabarta për zhvillim, punësim dhe pjesëmarrje aktive në jetën ekonomike e shoqërore. /2LONLINE/