Nënkryetarja Bajralija pret në takim përfaqësues nga KFOR

Nënkryetarja e Komunës së Kamenicës, Arta Bajralija, së bashku me zëdhënësen Lidiona Marovca, kanë pritur sot në një takim përfaqësues të KFOR-it, në kuadër të angazhimeve të vazhdueshme për forcimin e bashkëpunimit ndërinstitucional dhe rritjen e sigurisë në komunë.

Gjatë takimit, është diskutuar në detaje për mundësitë konkrete të bashkëpunimit në organizimin e Ditës së Komuniteteve, një aktivitet me rëndësi të veçantë për promovimin e bashkëjetesës, diversitetit kulturor dhe fuqizimin e kohezionit social në Komunën e Kamenicës.

Një ndër temat kyçe të diskutimit ishte edhe mbështetja në përforcimin e kapaciteteve të njësisë së zjarrfikësve, ku u theksua nevoja për avancimin e pajisjeve, trajnimeve dhe bashkëpunimit operacional, me qëllim të rritjes së gatishmërisë dhe reagimit në situata emergjente.

Po ashtu, palët diskutuan për thellimin e bashkëpunimit në fushën e sigurisë, duke vlerësuar lart rolin e KFOR-it si partner i rëndësishëm në garantimin e një mjedisi të sigurt për të gjithë qytetarët.

U theksua se ky bashkëpunim tradicional ndërinstitucional do të vazhdojë të forcohet edhe më tej përmes iniciativave të përbashkëta dhe komunikimit të vazhdueshëm. /2LONLINE/