Në Universitetin e Gjilanit do të pranohen 1 mijë e 376 studentë

Ministri i Arsimit, Shkencës dhe Teknologjisë, Arsim Bajrami, ka aprovuar numrin e studentëve të rinj, të cilët do të pranohen në programet e akredituara të nivelit bachelor në universitetet publike të Kosovës. Numri i studentëve që do të pranohen në shtatë universitetet publike të vendit për vitin akademik 2016/2017 është 15 mijë e 487, ndërsa shtesë e këtij numri do të jetë edhe kuota prej 12 përqindësh për studentët e komuniteteve joshumicë dhe në disa universitete do të ketë edhe kuota për kandidatët e viseve tjera shqiptare (Shqipëri, Luginë e Preshevës, Maqedoni, Mal i Zi), si dhe për familjarë të ngushtë të dëshmorëve të Kosovës.

MASHT-i nëpërmjet një komunikate për media ka njoftuar se të gjithë kandidatët e interesuar për studime në universitetet publike se prej nesër do të fillojnë të hapën konkurset për pranim në universitetet në Prishtinë, Prizren, Gjakovë, Gjilan, Pejë, Mitrovicë, Ferizaj.

Në Universitetin e Prishtinës “Hasan Prishtina”, do të pranohen 7 mijë e 806 studentë. Në Universitetin “Fehmi Agani” në Gjakovë 640 studentë. Në Universitetin “Haxhi Zeka” në Pejë 2 mijë e 502 studentë, në Universitetin “Kadri Zeka” në Gjilan 1 mijë e 376 studentë, në Universitetin e Prizrenit “Ukshin Hoti” do të pranohen 1 mijë e 330 studentë. Në Universitetin e Mitrovicës “Isa Boletini” do të pranohen 1 mijë e 283 studentë. Kurse, Universiteti i Shkencave të Aplikuara në Ferizaj do të pranojë 550 studentë.