Në UKZ u mbajt provimi pranues për studentët e rinj për vitin akademik 2026/2027

Në Universitetin Publik “Kadri Zeka” në Gjilan u mbajtën provimet pranues për kandidatët që kanë aplikuar për regjistrim në vitin e parë të studimeve bachelor për vitin akademik 2026/2027.

Procesi i provimit pranues u zhvillua në të gjitha njësitë akademike të Universitetit në programet përkatëse të studimit në Fakultetin e Edukimit, Fakultetin Ekonomik, Fakultetin e Shkencave Kompjuterike dhe Fakultetin e Shkencave Sociale.

Me këtë rast, Rektori i Universitetit Publik “Kadri Zeka”, Prof. Assoc. Dr. Artan Dermaku, së bashku me prorektorët, dekanët e njësive akademike dhe stafin drejtues, vizituan sallat ku u mbajten provimet pranues, duke u njohur nga afër me mbarëvajtjen e procesit. Rektori u ka uruar mirëseardhje kandidatëve dhe njëherësh i ka falënderuar për besimin dhe përzgjedhjen e Universitetit Publik “Kadri Zeka” si institucion ku ata synojnë të vazhdojnë rrugëtimin e tyre akademik. Njëkohësisht, kandidatëve iu ka uruar suksese në provimin pranues duke ju dëshiruar rezultate sa më të mira.

Provimi pranues u zhvillua duke respektuar të gjitha procedurat dhe rregullat e përcaktuara nga Universiteti Publik “Kadri Zeka”. Kandidatët ishin të obliguar të posedonin konfirmimin e aplikimit dhe letërnjoftimin, ndërsa gjatë kohës së provimit ishte i ndaluar përdorimi i telefonave celularë.

Universiteti Publik “Kadri Zeka” falënderon të gjithë kandidatët për interesimin e treguar për të qenë pjesë e këtij institucioni dhe u uron suksese në rezultatet e provimit pranues, duke shpresuar që së shpejti t’i mirëpresë si studentë të rinj të universitetit. /2LONLINE/