Në UKZ, BIRN Kosova debaton për personat e zhdukur në Kosovë
Në Universitetin Publik “Kadri Zeka” në Gjilan u shfaq dokumentari dhe u mbajt debati publik në kuadër të projektit të financuar nga Bashkimi Evropian “Shpalosja e së Vërtetës: Luftimi i Gazetarisë Monoetnike dhe Avokimi për Personat e Zhdukur në Kosovë”, i realizuar nga BIRN Kosova dhe Qendra e Avokimit për Kulturë Demokratike (ACDC).
Ky aktivitet ishte pjesë e një serie debatesh publike të organizuara nga BIRN Kosova, të cilat synojnë të nxisin dialogun gjithëpërfshirës mbi çështjen e personave të zhdukur në Kosovë dhe të forcojë angazhimin e institucioneve, organizatave të shoqërisë civile dhe qytetarëve në adresimin e kësaj çështjeje me rëndësi të veçantë shoqërore.
Dokumentari solli rrëfime dhe dëshmi nga familjarët e personave të zhdukur nga Rajoni i Gjilanit, ku Xhevat Ajetin, Xhemile Morinën, Goran Zdravkoviqin dhe Remzi Hajrullahun, ndanë përvojat dhe sfidat me të cilat janë përballur në kërkimin e më të dashurve të tyre.
Pas shfaqjes së dokumentarit u mbajt një debat publik i moderuar nga gazetarja dhe drejtoresha ekzekutive e BIRN Kosovës, Jeta Xharra.
Panelistët ishin Ilir Morina nga Prokuroria Speciale, Kushtrim Gara nga Komisioni Qeveritar për Persona të Zhdukur, Ditor Haliti nga Instituti i Mjekësisë Ligjore dhe Kreshnik Gashi nga KALLXO.com.
Gjatë diskutimit u trajtuan temat që lidhen me gjetjen e personave të zhdukur, sfidat institucionale, bashkëpunimin ndërinstitucional, si dhe rolin e familjarëve dhe shoqërisë civile në procesin e drejtësisë tranzicionale.
Panelistët theksuan se çështja e personave të zhdukur mbetet një nga plagët më të mëdha të pasluftës në Kosovë. U rikujtua se edhe pas më shumë se dy dekadash nga përfundimi i luftës, 1,560 persona vazhdojnë të figurojnë të zhdukur, ndërsa familjet e tyre ende presin të mësojnë për fatin e më të dashurve të tyre.
Në këtë organizim morën pjesë përfaqësues të institucioneve publike, organizatave të shoqërisë civile, stafi dhe sudentët e universitetit si dhe qytetarë tjerë të interesuar.
Pjesëmarrësit kërkuan angazhim më të madh institucional, shtim të bashkëpunimit ndërmjet institucioneve vendore dhe ndërkombëtare, si dhe vazhdimin e përpjekjeve për zbardhjen e fatit të personave të zhdukur. /2LONLINE/