Në tri raste të ndara janë gjetur dhe konfiskuar armë

Autoritetet policore kanë bërë me dije se në Gjilan dhe Kamenicë, në tri raste të ndara, janë gjetur dhe konfiskuar armë. Sipas raportit policor, dy raste janë regjistruar në Komunën e Gjilanit dhe një në atë të Kamenicës.

Në rastin e parë, nga personi i dyshuar policia ka konfiskuar një pushkë gjuetie, me afat të skaduar të lejes së armës. Lidhur me rastin, është njoftuar edhe prokurori kompetent.

Në rastin tjetër, gjatë kontrollit në shtëpinë e të dyshuarit, është gjetur dhe konfiskuar një pistoletë me gaz. Me vendim të prokurorit, pas intervistimit, i dyshuari është liruar në procedurë të rregullt.

Kurse, në rastin e tretë, në Vriqec, të Komunës së Kamenicës policia ka arrestuar një të dyshuar, pasi që te i njëjti është gjetur dhe konfiskuar një pushkë gjuetie.