Në Rozhajë nënshkruhet peticioni kundër kufirit me Kosovën
Në qytetin malazez të Rozhajës ka filluar nënshkrimi i peticionit me të cilin kërkohet ridefinimi i sërishëm i kufirit me Kosovën, me qëllim të kthimit të territorit i cili u është marrë nga ky proces.
Qytetarët thonë se me këtë vendim u është rrezikuar seriozisht turizmi pasi ky territor ka qenë lidhja e tyre kryesore me malin Hajla, transmeton Klan Kosova.
Në këtë peticion, mes tjerash, thuhet:
“Me ndarjen e re ka ardhur deri te lëvizja e kufirit të vjetër, me ç’rast është marrë territori më i rëndësishëm për zhvillimin e turizmit malor në Rozhajë”.
“Me kufirin e ri, Rozhaja e ka humbur rrugën me të cilën ka qenë e mundshme që të shkohet me automjet në njërin prej maleve më të bukura në rajon”.
“Me këtë kufi të ri ne e humbim anën e malit që e ka potencialin më të madh për shtegun skiator me lartësi mbidetare prej 600 metrash, të cilën ekspertët e skijimit e kanë cilësuar si të përsosur sa i përket pjerrtësisë”.
Peticioni është duke u nënshkruar në Sheshin Mulla Jakup Kardovic, në Rozhajë.
Edhe Lidhja Demokratike e Boshnjakëve e ka kritikuar marrëveshjen për kufirin.
“Askush nga Rozhaja nuk ka marrë pjesë në krijimin e hartave topografike. Pse Rozhaja duhet ta paguajë çmimin me marrjen e pjesës më të çmuar të saj në malin Hajla?”.