Në Remnik e Skifteraj u mbajt diskutim publik për planifikim të buxhetit

/2L ONLINE/ – Me qëllim të planifikimit të buxhetit komunal për periudhën 2016-2018, kanë filluar diskutimet publike me qytetar, për identifikimin e nevojave dhe projekteve prioritare.

Takimet e para ku është diskutuar për këtë çështje janë mbajtur mbrëmë në Remnik dhe Skifteraj, ku qytetarët patën rastin të njihen nga zyrtarët komunal për rëndësinë e këtyre diskutimeve dhe ndikimi i qytetarëve në vendimmarrjen e projekteve prioritare.

Zv. kryetari i komunës së Vitisë Hasan Aliu, duke folur për angazhimet dhe punën e deritanishme të qeverisjes komunale, ka theksuar se komuna po bënë përpjekje që të jetë sa më afër qytetarit në ofrimin e shërbimeve dhe një mirëqenie më të mirë, ndërkaq për diskutimet publike për planifikimin e buxhetit është shprehur se janë të rëndësisë së veçantë për faktin se në këto takime merren parasysh nevojat e qytetarëve në mënyrë të drejtpërdrejtë.

“Vitin e kaluar kemi pasur 14 dëgjime publike, ndërkaq sivjet do të jemi në 20 takime nëpër lokalitete dhe grupe të tjera. Shtimin e numrit të takimeve e kemi bërë me qëllim që të japim mundësi më shumë qytetarëve dhe kategorive të ndryshme që të kenë qasje në planifikimin e buxhetit në mënyrë që ndarja mandej të jetë sa më e barabartë”, tha Aliu.

Ai u shpreh se si udhëheqje komunale së bashku me zyrtarin financiar janë këtu të dëgjojnë zërin e qytetarëve dhe të marrin hapur propozimet që dalin nëpër këto takime. Për planet buxhetore dhe procedurat e aprovimit të buxhetit, si edhe afatet kohore, qytetarët i njoftoi Berat Zuka zyrtar i larë i buxhetit.

Ndërkaq në pjesën e dytë, nga banorët u dhanë propozimet dhe u paraqiten kërkesat për projektet që janë më me prioritet. Në Remnik, ndër projektet më me rëndësi u veçuan rrethoja e shkollës, rregullimi i kanalizimit të shkollës megjithëse gjysma e këtij rrjeti nuk është funksional.

Mandej asfaltimi I rrugës që lidh fshatin Remnik me fshatin Nasalë të komunës së Gjilanit që ka një gjatësi prej 1600 metrash, ndërtimi I trotuarit në rrugën e fshatit, vazhdimi i projektit të ndriçimit publik që ende është i nevojshëm të shtrihet dhe disa projekte të tjera.

Kurse në Skifteraj, banorët kishin identifikuar së bashku me Këshillin e fshatit nevojat që ka ky lokalitet duke I dhënë më shum prioritet ri funksionalizimit të ujësjellësit dhe kanalizimit, rregullimin e trotuarit në tërë gjatësinë e rrugës kryesore, shtrirjen e kanalizimit për lagjet Avdiu, Ismajli, Haliti, përfshirjen e gjithë fshatit në sistemimin e mbeturinave dhe rregullimin e punktit shëndetësor të fshatit.

Po ashtu si nevojë që kërkon një intervenim u përmendën edhe rregullimi i rrjetit të ngrohjes në shkollë, rrethoja e shkollës, parking i shkollës për automjete etj. /2L ONLINE/