Në Qendrën “Don Bosko” u mbajt ligjërata mbi rolin dhe rëndësinë e Inspektoratit Policor të Kosovës në sundimin e ligjit

Në kuadër të aktiviteteve të planifikuara nga Inspektorati Policor i Kosovës (IPK) për vetëdijesimin e qytetarëve mbi fushëveprimin ligjor të tij, në Qendrën “Don Bosko” në Gjilan u mbajt një ligjëratë me temën “Inspektorati Policor i Kosovës, roli dhe rëndësia në sundimin e ligjit në Kosovë”.

Ky aktivitet, i organizuar me nxënësit e kësaj shkolle kishte për qëllim informimin dhe ngritjen e vetëdijes së tyre mbi mekanizmat e mbikëqyrjes së institucioneve të sigurisë dhe rolin e IPK-së në ruajtjen dhe fuqizimin e integritetit në Policinë e Kosovës.

Zyrtarët e IPK-së prezantuan detyrat dhe përgjegjësitë e IPK-së si agjencie mbikëqyrëse, duke theksuar rëndësinë e saj në sigurimin e profesionalizmit, përgjegjshmërisë dhe llogaridhënies brenda forcave policore.

Gjatë ligjëratës, nxënësit patën mundësinë të shtrojnë pyetje dhe të marrin përgjigje të detajuara nga përfaqësuesit e IPK-së mbi temat që lidhen me mekanizmat e ankesës, hetimet dhe inspektimet e pavarura mbi Policinë e Kosovës.

Në kuadër të diskutimeve gjatë ligjëratës u trajtuan edhe tema si roli i qytetarit në mbajtjen e institucioneve përgjegjëse dhe llogaridhënëse në kuadër të sundimit të ligjit.

IPK falënderon stafin e Qendrës “Don Bosko” dhe nxënësit e kësaj shkolle për bashkëpunimin dhe përkrahjen e dhënë për realizimin e këtij aktiviteti. /2LONLINE/