Në pritje të seancës inauguruese të Kuvendit Komunal të Gjilanit!

“Prej të premtes së kaluar ka filluar të rrjedhë afati 15-ditor për thirrjen e seancës së betimit. Pas betimit, vazhdon afati prej 30 ditësh për zgjedhjen e Kryesuesit të Kuvendit. 05.12.2025 është data e fundit për kryerjen e betimit. 04.01.2026 është data e fundit për zgjedhjen e Kryesuesit”, ka bërë me dije, Kushtrim Kadriu, kryesues i deritanishëm i këtij organi më të lartë në komunë dhe i cili ka fituar sërish mandat të kuvendarit si përfaqësues i Lëvizjen Vatra.

Ai tha se së bashku me stafin e Kuvendit, kanë bërë gati të gjitha përgatitjet për nisjen e legjislaturës së re. Gjithashtu, kanë vendosur kontakt me Isa Agushin si anëtarin më të vjetër të kuvendit, i cili do ta kryesojë Asamblenë në seancën inauguruese.

“Urojmë që ky mandat të jetë mandat i vazhdimësisë së punës së mirë që u realizua në mandatin e fundit, ku Asambleja u shpall si një nga më të suksesshmet në Kosovë dhe tre nga asamblistët rezultuan ndër më të suksesshmit.  Unë do të vazhdoj të jem i përkushtuar për të përfaqësuar drejt dhe me aktivizëm të gjithë votuesit e mi, të cilët tash e katër mandate kanë qëndruar besnikë ndaj meje dhe lëvizjes që përfaqësoj”, ka thënë Kushtrim Kadriu.  /2LONLINE/