Në prag të Bajramit shpërndahen mbi 250 pako ushqimore për familjet në nevojë

Sot, në prag të festës së Fitër Bajramit, Këshilli i Bashkësisë Islame në Gjilan, nëpërmjet degës së shoqatës humanitare “Bereqeti”, realizoi një aksion të gjerë bamirësie duke shpërndarë mbi 250 pako ushqimore për familjet në nevojë, veteranët e luftës, shoqatën e të verbërve dhe kategori të tjera në nevojë.

Ky aktivitet humanitar vjen si shprehje e solidaritetit, përkujdesjes dhe përkushtimit institucional ndaj shtresave më të ndjeshme të shoqërisë, me qëllim që gëzimi dhe begatia e festës së Bajramit të jenë të pranishme në çdo familje. Përmes këtij angazhimi u dëshmua edhe njëherë roli i rëndësishëm i institucioneve fetare dhe organizatave humanitare në kultivimin e vlerave të mëshirës, ndihmës së ndërsjellë dhe bashkimit shoqëror.

Këshilli i Bashkësisë Islame në Gjilan shpreh mirënjohje të thellë për të gjithë kontribuuesit dhe mbështetësit, veçanërisht për Sh.B. “Bashkëveprimi”, Arsi Kola, Floil, Interex, si dhe donatorët e shumtë nga Sofra e Ramazanit, të cilët bënë të mundur realizimin me sukses të këtij aksioni humanitar. Lusim Allahun e Madhëruar që çdo kontribut të shpërblehet me të mira, begati dhe mirësi të shumta. /2LONLINE/