Në ndërtesën e Këshillit të Bashkësisë Islame në Gjilan u vendos pllaka me mbishkrimin “Shtëpia-Bazë e UÇK-së”

Mbështetur në Statutin e Organizatës së Veteranëve të Luftës së Ushtrisë Çlirimtare të Kosovës dhe në dëshmitë e ish eprorëve të Zonës Operative të Karadakut sot në ndërtesën e Këshillit të Bashkësisë Islame (KBI) në Gjilan, është vendosur pllaka me mbishkrim “Shtëpia Bazë e UÇK-së”, thuhet në njoftimin e KBI-së.

Në këtë event përveç nikoqirit kryetarit të KBI-së në Gjilan, Naim Aliut, me bashkëpunëtorët e tij, morën pjesë edhe kryetari i Komunës së Gjilanit, Alban Hyseni, komandanti i ish ZOK të UÇK-së, Ahmet Isufi, Kryetari i OVL-UÇK, dega në Gjilan, Xhevdet Mehmeti dhe bashkëveprimtarë të tjerë të asaj periudhe.

“Në takimin e mbajtur sot gjithashtu u potencua edhe njëherë  kontributi i theksuar i hoxhallarëve të asaj kohe për kombin dhe atdheun”, thuhet në njoftimin e KBI-së. /2LONLINE/