Në Muzeun Etnografik të Gjilanit, vendosen pushkët e kryengritësve për lirinë e shqiptarëve, Hasan Alia e Hoxhë Lipovica
Në Muzeun Etnografik të Gjilanit, vendosen pushkët e kryengritësve, Hasan Alia e Hoxhë Lipovica, të dhuruara nga këto dy familje.
Kreu i Gjilanit, Lutfi Haziri, tha se pushkët e dy kryengritësve më të mëdhenj dëshmojnë të kaluarën tonë të lavdishme.
“Në 70 vjetorin e vrasjes në pritë, dy pushkët e kryengritësve më të mëdhenj të Luftës së Dytë Botërore të Karadakut dhe të kësaj pjesë të Kosovës, Hasan Alisë dhe Hoxhë Lipovicës, u vendosën sot në Muzeun Etnografik, të dhuruara nga familjet e tyre.. Neve na bën nder që në këtë Muze të sillen eksponatet dhe të vendoset pasqyra e të kaluarës, në mënyrë që gjeneratat e ardhshme të edukohen, të mësojnë dhe të shohin këtë histori të lavdishme. Unë kërkoj nga të gjitha familjet të cilët kanë fotografi ose arte-fakte e mjete tjera që t’ia ofrojnë Muzeut për ta pasqyruar historinë tonë. Falëmnderit familjeve ”, ka thënë Haziri.
Haziri e ka falënderuar shkrimtarin, Sabit Rrustemi, i cili bashkë me të tjerët ka punuar shumë në zbardhjen e historisë në këto 20 vjetët e fundit.
Në emër të familjes së Hasan Alisë ka folur nipi i tij i cili e mban emrin e tij, nënkryetari i Vitisë, Hasan Aliu, i cili tha se ndjehet i impresionuar me investimin në Muzeun Etnologjik.
“Kryetari Haziri, me këtë investim këtu, na paska obliguar të gjithëve që të ofrojmë arte-fakte për Muzeun Etnologjik për pasqyrimin e historisë sonë të lavdishme”, ka thënë ai.
Në fund, kryetari Haziri ka ndarë mirënjohje për familjen Alia e Baftjari për dhurimin e pushkëve të kryengritësve për lirinë e shqiptarëve.
Të interesuarit, mund të shkojnë për t’i parë nga afër pushkët e eksozuara deri më 28 nëntor.