Në Kirurgjinë Plastike po bëhen operacionet e para për rikonstruktimin e gjirit

Në Kirurgjinë Plastike të Qendrës Klinike Universitare të Kosovës po bëhen operacionet e para për rikonstruktimin e gjirit, njofton Shërbimi Spitalor Klinik dhe Universitar i Kosovës.

Sipas programit operativ, për tri ditë do të operohen 6 gra.

Gjatë tetorit, muajit të ndërgjegjësimit për zbulimin e hershëm të kancerit të gjirit, në Kirurgjinë Plastike kanë filluar kontrollat mjekësore të grave, që janë operuar nga kanceri i gjirit.

Ndërkaq, një muaj më vonë, bashkë me kirurgët plastikë, Erik Vogelenzang, përfaqësues i një kompanie gjermane, që i ka dhuruar QKUK-së donacionin me protezat e gjirit dhe udhëheqës i projektit për mbështetjen e grave me kancer në nivel global, ka bërë matjen e ekspanderëve indorë dhe implanteve të duhura te gratë që ishte planifikuar të operohen,  njofton Shërbimi Spitalor Klinik dhe Universitar i Kosovës /2LONLINE/