Në Kamenicë u shfaq “Qark i (pa)mbyllur Burgjesh”
Në kuadër të agjendës së aktiviteteve për shënimin e 100-vjetorit të lindjes së Heroit Kombëtar Metush Krasniqi, në Shtëpinë e Kulturës “Isa Kastrati” në Kamenicë është shfaqur vepra performative “Qark i (pa)mbyllur Burgjesh”.
Shfaqja “Qark i (pa)mbyllur Burgjesh” është bazuar në librin me të njëjtin titull të autorit Enver Dugolli, ndërsa në rolet kryesore interpretuan aktorët Afrim Muçaj dhe Artan Geca.
Vepra e prodhuar nga Organizata “Molla e Kuqe”, solli para publikut një rrëfim të fuqishëm artistik mbi përvojat dhe peripecitë e të burgosurve politikë shqiptarë, duke përcjellë mesazhe të rëndësishme për kujtesën historike, qëndresën dhe sakrificën për liri.
Aktiviteti ishte pjesë e programit të organizuar në Kamenicë për nder të 100-vjetorit të lindjes së Heroit Kombëtar Metush Krasniqi, duke kontribuar në ruajtjen dhe përcjelljen te brezat e rinj të kujtesës për figurat dhe ngjarjet e rëndësishme të historisë sonë. /2LONLINE/