Në Kamenicë do të organizohet Kupa e Anamoravës në Matematikë

Drejtori i Drejtorisë Komunale të Arsimit, në Komunën e Kamenicës, Selami Klaiqi, ka zhvilluar një takim me Kryetarin e Shoqatës së Matematikanëve të Gjilanit, Bregan Isufi, ku u diskutua për iniciativa të rëndësishme në fushën e arsimit dhe avancimin e matematikës tek nxënësit.

Në këtë takim u bë e ditur se për herë të parë në Kamenicë do të organizohet “Kupa e Anamoravës” në gara të matematikës, një ngjarje që synon të promovojë dijen dhe talentin e nxënësve në këtë fushë. Në këtë aktivitet pritet të marrin pjesë nxënës nga Kumanova, Gjilani, Presheva, Bujanovci, Medvegja, Vitia dhe Novobërda.

Sipas planifikimeve, Kupa e Anamoravës pritet të mbahet në fillim të muajit qershor, duke shënuar një hap të rëndësishëm në bashkëpunimin rajonal dhe në nxitjen e konkurrencës pozitive ndërmjet nxënësve.

Gjithashtu, gjatë takimit u theksua se duke filluar nga muaji shtator, do të organizohen kurse falas në lëndën e matematikës për nxënësit e shkollave fillore dhe të mesme të ulëta. Këto kurse kanë për qëllim përmirësimin e rezultateve në mësimnxënie dhe mbështetjen e nxënësve në zhvillimin e aftësive të tyre në matematikë.

“Ky bashkëpunim ndërmjet institucioneve arsimore dhe shoqatave profesionale konsiderohet një hap i rëndësishëm drejt ngritjes së cilësisë në arsim dhe fuqizimit të brezave të rinj”, ka thënë ndër të tjerash Drejtori Klaiqi.   /2LONLINE/