Në Gjilan u organizua tryeza me temën “Ndikimi i gruas në tolerancën fetare”

/2L ONLINE/ – Në kuadër të Muajit të Tolerancës dhe Solidaritetit që po organizohet në tetor me iniciativë të kryetarit Lutfi Haziri, në Gjilan është mbajtur sot një tryezë me temën “Ndikimi i gruas në tolerancën fetare”, i realizuar në bashkëpunim me organizatën “UN Women”.

Në takim ka marrë pjesë kryesuesja Valentina Bunjaku Rexhepi, krerët e bashkësive fetare në Gjilan, përfaqësues të policisë lokale dhe regjionale, sikurse edhe përfaqësues të organizatave të ndryshme të grave.

Në emër të kryetarit Haziri, ka folur kryesuesja Valentina Bunjaku Rexhepi, e cila vlerësoi se gruaja gjilanase ka luajtur rol shumë të rëndësishëm në aspektin e tolerancës fetare.

Poashtu, Bunjaku-Rexhepi tha se me vetë faktin se qytetarët i kanë besuar asaj për të qenë në pozitën e kryesueses, tregon për tolerancën dhe avancimin e gruas në Gjilan.

Sylejman Osmani, kryetar i Bashkësisë Islame në Gjilan, theksoi rëndësinë që gruaja në Gjilan ka pasur në avancimin e tolerancës, duke shtuar se çdo ditë, me ligjëratat e tyre punojnë që të ketë një dinjitet në trajtimin e gruas.

Ai tha se debatet e tilla i japin mundësi që t’i promovojnë vlerat e mira të fesë, tolerancës dhe bashkëjetesës mes të gjitha komuniteteve.

Përfaqësëuesi i Kishës Katolike, Don Dominik Qerimi, ka pohuar se tryezat e tilla shërbejnë që të afrohemi me njëri-tjetrin, ndërkaq përfaqësuesi i Kishës Protestante, Naim Bllaca, është shprehur se përmes këtyre takimeve në kuadër të muajit të tolerancës, e kanë parë se sa shumë gjëra kanë nevojë t’i diskutojnë mes vete.

Komandanti i Policisë lokale në Gjilan, Remzi Azemi, ka thënë se toleranca fetare në Gjilan ka nevojë që të shtrihet në të gjitha sferat e jetës, dhe për këtë, shtoi se kontribut shumë të rëndësishëm mund të japin krerët e bashkësive fetare.

Ndryshe, kryetari Haziri ka paralëjmëruar dje se më 1 nëntor Komuna e Gjilanit do të filloj pastrimin e varrezave myslimane dhe katolike, sikurse që tha se do të bëhet edhe konzervimi i këtyre varrezave, pasi Komuna do të bëjë vend për varrezat e reja të qytetit si për komunitetin mysliman, ashtu edhe për atë katolik dhe protestant./2L ONLINE/