Në dy raste të ndara, Prokuroria Speciale ndalon për 48 orë 8 persona

Prokuroria Speciale e Republikës së Kosovës, të martën, më 9 qershor, ka zhvilluar operacione në dy raste të ndara kundër krimit të organizuar, ku janë arrestuar tetë persona.

Gjatë operacioneve, nën udhëheqjen e PSRK-së dhe në bashkëpunim me Policinë e Kosovës, në të dy rastet janë sekuestruar prova relevante që do të shërbejnë gjatë procedurave penale.

Në rastin “White Star”, u arrestuan pesë persona, nën dyshimin për kryerjen e veprave penale:pjesëmarrja ose organizimi i grupit kriminal të organizuar;blerja, posedimi, shpërndarja dhe shitja e paautorizuar e narkotikëve; si dhe pastrimi i parave.

Ndërsa, në rastin e dytë i koduar me emrin “Mega”, tre personat e arrestuar dyshohen për:Pjesëmarrje ose organizim i grupit kriminal të organizuar;Financim i terrorizmit; Shpëlarje e parave; Mashtrim; Detyrim; Import, eksport, furnizim, transportim, prodhim, këmbim, ndërmjetësim ose shitje e paautorizuar e armëve apo materialeve plasëse;Blerje, posedim, shpërndarje dhe shitje e paautorizuar e narkotikëve, substancave psikotrope dhe analogeve të tyre.

Rastet hetimore janë mbështetur nga institucione ndërkombëtare të drejtësisë, të cilat në vazhdimësi bashkëpunojnë ngushtë me PSRK-në, si FBI, Europol, autoritetet policore të Belgjikës, Francës, Holandës dhe Kanadasë (RCMP), si dhe OPDAT nga Departamenti i Drejtësisë i Shteteve të Bashkuara.

Prokuroria Speciale është e angazhuar në luftimin e krimit të organizuar dhe do të vazhdojë bashkëpunimin me institucionet vendore dhe ndërkombëtare për garantimin e sundimit të ligjit dhe sigurisë së qytetarëve, thuhet në njoftimin e Prokurorisë Speciale. /2LONLINE/