Ndërtohen 15 sera për fermerët në Komunën e Gjilanit

(2L ONLINE) – Drejtori i Bujqësisë dhe Pylltarisë, Ramiz Ramadani, i shoqëruar nga shefi i kabinetit të kryetarit të Komunës së Gjilanit, Arbër Ismajli dhe bashkëpunëtorë të tjerë, kanë vizituar fermerët të cilët kanë nisur montimin e serave, të cilat janë investim i Drejtorisë së bujqësisë dhe përfitues janë 15 fermerë.

Me këtë rast drejtori Ramadani ka dhënë detajet e këtij projekti duke bërë të ditur se këtu automatikisht krijohen vende të reja pune, por edhe prodhime cilësore që mund t’u shërbehen qytetarëve të Komunës së Gjilanit.

“Investimi i Komunës së Gjilanit në këtë projekt është mbi 17 mijë euro, me participim të fermerëve prej mbi 5 mijë euro. Brenda këtij muaji do të ndërtohet 15 serra, ndërsa deri më tani 4 sosh prej tyre janë përfunduar. Nga këto serra 9 prej tyre janë nga 150 metra katror ndërsa 6 të tjera janë prej 300 metra katror, e që në secilën prej tyre është nga një vend i punës. Planifikimi për këtë vit ka qenë i kësaj natyre, ndërsa për vitin e ardhshëm shpresojmë se do të kemi një mundësi edhe më të madhe për investime të kësaj natyre për serat e produkteve bimore, ngase interesimi i fermerëve ka qenë shumë i madh”, ka thënë Ramadani.

Sipas tij, investimi i Komunës është vetëm në konstruksionin metalik, ndërsa folinë plastike dhe mbjellja u mbetet fermerëve. Ramadnai ka shtuar se Drejtoria që ai drejton është e përkushtuar që të jetë një mbështetje serra3.JPGedhe më e madhe e fermerëve të Gjilanit.

Ndërsa fermerët Kadri Shabani, Shefqet Daku dhe Misrete Elezi, iu kanë falënderuar Komunës së Gjilanit, duke i vlerësuar projektet dhe investimin e bërë në këtë drejtim.

“Kjo është një mbështetje e madhe që na ofrohet neve si fermer në sektorin e mbjelljes së bimëve të ndryshme. Këto sera janë shumë të mirëseardhura për veve si fermer. Këtë hapësirë ne do ta shfrytëzojmë edhe në periudhën e ftohtë të dimrit, sepse janë mundësit. Planifikojmë që menjëherë të bëjmë mbjelljen e spinaqit, qepëve dhe sallatave të tjera, ndërsa gjatë verës në do të bëjmë mbjelljen e specave, domateve, trangujve etj”, kanë thënë ata, duke u zotuar se gjatë viteve të ardhshme do ta zgjerojnë edhe më shumë hapësirën e serave të ndërtuara, ngase ka leverdi dhe mund të sigurohen të ardhura të mjaftueshme për t’i krijuar të ardhura familjeve tona. /2L ONLINE/