Nderim i Veçantë për Remzi Hoxhën në Capitol Hill, Washington, DC!
NGA: Faton Bislimi
Sot, më 12 qershor – në ditën kur kujtojmë çlirimin e Kosovës – pata privilegjin e rrallë dhe emocione të veçanta t’ia dorëzoj mikut tim Ardian Hoxha Mirënjohjen Kongresionale dhe Flamurin e SHBA-së, i cili është valvitur mbi Capitol Hill, në nderim të babait të tij, Remzi Hoxha.
Ky nder i është bërë Remzi Hoxhës me 21 dhjetor 2024, pikërisht në ditëlindjen e tij – si një përkujtim i denjë për kontributin dhe sakrificën e tij për lirinë dhe pavarësinë e Kosovës. Ky flamur dhe mirënjohje u siguruan me kërkesën time nga Senatori Chuck Schumer, atëkohë Udhëheqës i Shumicës në Senatin Amerikan, në shenjë respekti për një jetë të dhënë për lirinë dhe të ardhmen tonë.
Edhepse ai u zhduk dhunshëm më 1995 dhe e vërteta për fatin e tij ende nuk është zbardhur–figura, idealet dhe sakrifica e Remziut jetojnë përtej mungesës fizike.
Ishte një moment shumë prekës t’ia dorëzoja këtë nder Ardianit – një bir që nuk u dorëzua asnjëherë përballë dhimbjes, por e shndërroi atë në forcë për të ndërtuar dhe edukuar breza të rinj përmes punës së tij me ASK. Inspirimi i Remzi Hoxhës jeton përmes Ardianit dhe gjithçka që ai bën.
Për mua, kjo nuk ishte vetëm një ceremoni formale. Ishte një homazh i shpirtit ndaj një njeriu që e deshi Kosovën më shumë se veten. Ishte një përqafim simbolik mes kujtesës dhe të ardhmes, mes dhimbjes dhe shpresës.
Lavdi jetës dhe veprës së Remzi Hoxhës!
Mirënjohje e përjetshme për ata që sakrifikuan gjithçka për lirinë tonë. /2LONLINE/