Ndahet nga jeta në moshën 66-vjeçare ish-mësimdhënësja e Gjuhës Shqipe në Gjilan, Mihane Sermaxhaj Ismajli

Arsimi në Gjilan ka humbur një figurë të respektuar. Është ndarë nga jeta në moshën 66-vjeçare, Mihane Sermaxhaj Ismajli, ish-mësimdhënëse dhe punonjëse e përkushtuar e arsimit.

E ndjera i kushtoi një pjesë të rëndësishme të jetës së saj edukimit të brezave të rinj. Për vite me radhë, ajo shërbeu me përkushtim si arsimtare e Gjuhës Shqipe në Shkollën e Mesme të Ulët “Abaz Ajeti” në Gjilan. Pas një kontributi të çmuar në mësimdhënie, ajo vazhdoi misionin e saj pranë nxënësve dhe librit, duke punuar si bibliotekiste po në këtë institucion shkollor, deri në daljen e saj në pension.

Kontributi i saj ndër vite në përcjelljen e dijes dhe dashurisë për gjuhën shqipe do të mbahet mend gjatë nga ish-nxënësit, kolegët dhe i gjithë kolektivi i shkollës “Abaz Ajeti”.

Familjarët kanë njoftuar se lamtumira e fundit për të ndjerën do të jepet ditën e sotme – E premte, 10 Korrik. Ceremonia e varrimit do të zhvillohet në kohën e ikindisë, në varrezat e qytetit në Gjilan. /2LONLINE/