Nazim Gagica (AAK): Gjilanit i duhet një kuvend funksional – kuvendit i duhet Ibish Ibishi (video)

Nazim Gagica, kreu i Degës së AAK-së në Gjilan, njëherësh kandidat për kryetar komune në zgjedhjet lokale që do të mbahen në tetor, ka prezantuar Ibish ibishin, si njëri prej atyre që do ta pasurojë listën e AAK-së në garën për asamble komunale.

“Në tre mandate të mëparshme të suksesshme në Kuvendin Komunal të Gjilanit, Ibish Ibishi ka dëshmuar përkushtim dhe përfaqësim të denjë, veçanërisht për banorët e Mireshit, duke qenë zë i fuqishëm për kërkesat dhe nevojat e tyre”, ka thënë Gagica.

Ai shtoi se me mbi 30 vjet përvojë në shërbim të shëndetit publik, Ibishi ka shërbyer me përkushtim e ndershmëri në institucionet shëndetësore, gjithmonë në anën e qytetarit.

I pari i AAK-së së Gjilanit tha se Ibishi si veprimtar i devotshëm i çështjes kombëtare dhe i përndjekur nga ish-sistemi, përfaqëson një brez që nuk është dorëzuar kurrë përballë sfidave – dhe këtë përkushtim e bart me vete edhe sot në politikën lokale.

“Mandatin e fundit mungesa e tij në Kuvend është ndjerë thellë. Rikthimi i Ibishit nuk është thjesht nevojë, është domosdoshmëri për një Kuvend më të përgjegjshëm dhe më afër qytetarit. Rikthimi i tij është rikthim i zërit të qytetarëve të ndershëm. Na priftë e mbara”, ka thënë Nazim Gagica i AAK-së.  /2LONLINE/