Mustafa: Shumica vendos për Kuvendin dhe Qeverinë

Kryetari i LDK-së, Isa Mustafa, ka thënë se gjyqtari amerikan, hartues i Kushtetutës së Kosovës, John Tunheim e ka shpjeguar qartë sistemin parlamentar. Mustafa në profilin e tij në “Facebook”, ka shkruar se pa shumicë parlamentare nuk mund të zgjedhet kryetari i Kuvendit dhe Qeveria.“Gjyqtari amerikan, hartues i Kushtetutës së Kosovës, John Tunheim e shpjegoi qartë sistemin parlamentar. Ai theksoi se “Kosova është sistem parlamentar dhe kësisoj pa e pasur shumicën parlamentare s’mund ta formosh qeverinë”.

Rrjedhimisht, pa e pasur shumicën parlamentare, mund ta propozosh edhe qeverinë edhe organet e Kuvendit, por vetëm shumica i zgjedh ato. Kjo ka qenë e njohur për të gjithë ne, por mbetet tani të bëhet e njohur edhe për PDK-në dhe Gjykatën Kushtetuese, ose këto dy palë ta argumentojnë para opinionit sesi në një sistem parlamentar mund të zgjidhet Qeveria, Kryetari dhe nënkryetarët e Kuvendit pa shumicë parlamentare.

Nëse, së paku Gjykata Kushtetuese nuk e bën këtë, atëherë ajo përfundimisht e vërteton se nuk qëndron të jetë një institucion i pavarur, sipas Kushtetutës, por ka marrë anë politike në këtë proces jetik për Kosovën”, ka thënë Mustafa.