Mustafa: SHBA i di kufijtë e Ballkanit më mirë se do ekspertë tanë

Kryeministri Isa Mustafa ka thënë, nëpërmjet një postimi në llogarinë e tij në Facebook, se hartat e Departamentit të Shtetit Amerikan janë më të sakta sesa ato të ekspertëve vendorë. Për këta të fundit, ai ka thënë se nuk i kanë vënë as vijat e tokave të tyre, e jo më ato të një kufiri shtetëror.

“Logjika e Këshillit të Përgjithshëm të LDK-së sot ishte se më të sakta janë hartat që i ka Departamenti i Shtetit i Shteteve të Bashkuara të Amerikës për kufijtë e vendeve të Ballkanit, pra ata që intervenuan ushtarakisht në Kosovë , sesa hartat e do ekspertëve tanë, (që as megjat e tokave të veta nuk i kanë vënë e lere më të kenë përcaktuar një kufi shtetëror- vërejtja ime) e që po e kundërshtojnë demarkacionin me Malin e Zi”, ka shkruar Mustafa.

Ai më tej ka thënë se DSH i SHBA-ve kishte konstatuar se kufijtë e vënë nga Komisioni Shtetëror i Kosovës, janë në vijat ku SHBA ka pranuar pavarësinë e Kosovës.

“LDK ka besim të plotë në konstatimet e SHBA-ve dhe të vendeve të BE-së”, përfundon Mustafa.