Musmurati në Forumin e partive të Evropës Juglindore

Sekretari i Partisë Demokratike të Kosovës, Basri Musmurati mori pjesë në Forumin e partive politike të Evropës Juglindore, ku si temë bosht i takimit ishte “Diskursi politik”.

Takimin i cili u mbajt në Beograd, është organizuar nga Qendra Rajonale e Institutit Nacional Demokratike (NDI) për Evropën Juglindore dhe e udhëhoqi drejtori i saj, Robert Benjamin. Ndërsa fjalimin kryesor e mbajti guvernatori i Shtetit të Vermantit, për dy mandate, Howard Dean, transmeton Telegrafi.

“Musmurati pati një takim të veçantë me guvernatorin Howard Dean, i cili ka qenë kandidat për President të SHBA-së, nga radhët e Partisë Demokratike në zgjedhjet 2004”, thuhet në njoftimin e PDK-së.

Dean u interesua për gjendjen në Kosovë, veçmas për zgjedhjen e Presidentit të Kosovës. Sipas tij, duhet të mbizotëroi dialogu dhe respektimi i ligjeve, si dhe Kushtetutës për të dalë nga situate e krijuar në raport pozitë-opozitë. Në takim ishte prezent edhe Sadri Ferati nga LDK.

Forumi u organizua prej 12-14 shkurt, ku morën pjesë partitë më të mëdha politike të: Kosovës, Shqipërisë, Bosnje Hercegovinës, Malit të Zi, Maqedonisë, Serbisë, Kroacisë, Bullgarisë dhe Rumanisë.