Muqibaba e do mjekun

(2LONLINE) – Përfaqësuesi i fshatit Muqibabë, Vehid Ibrahimi ka bërë të ditur se po bëhen mbi 2 vite që mjeku nuk del në këtë fshat sikur dikur, për të ofruar shërbime shëndetësore jo vetëm për banorët e Muqibabës, por edhe të fshatrave përreth si Lipovicë, Burincë e Selishtë.

Ibrahimi tha se banorëve të fshatrave të brezit kufitar po u mungojnë shumë gjëra dhe se jeta atje është bërë e vështirë. Në këtë vazhdë është edhe mungesa e mjekut çfarë i detyron ata që kanë nevojë, të zbresin për mjekun në Gjilan, por që kjo u kushto shumë, kur kemi parasysh gjendjen aktuale ekonomike sociale të këtyre banorëve.

Shih për këtë, Vehid Ibrahimi, përfaqësues i fshatit thotë për Portalin 2Lonline se e ka bërë një kërkesë me shkrim në adresë të Drejtorisë Komunale për Shëndetësi dhe Mirëqenie Sociale të Gjilanit, e ku në emër të këtyre fshatrave kërkohet që mjeku së paku një herë në javë të del në Muqibabë ku ndodhet edhe objekti ku më parë ka qenë funksional e që ndodhet brenda shkollës së fshatit.

Por, Ibrahimi ndjehet i revoltuar që edhe pas një muaj e gjysmë qysh kur është bërë kërkesa në fjalë, ai nuk ka kurrfarë përgjigje, qoftë ajo edhe negative. Ai thotë se këtë e konsideron si injorim të asaj pjese e që nuk duhet bërë assesi. Përveç mjekut banorët e këtyre fshatrave kanë nevojë edhe për ndihma tjera sepse shumica jetojnë në kushte jo të mira.

Ai thotë se për nevojën e mjekut në fshat do t’i adresohet edhe kryetarit të komunës nëse në ditët në vijim nuk do të merr ndonjë përgjigje në kërkesën e bërë. /2lonline/