MSh organizoi punëtori në nivel ekspertësh për sigurimet shëndetësore në Kosovë

Organizuar nga Ministria e Shëndetësisë dje dhe sot në Prishtinë u mbajt punëtoria me temën: “E kaluara, e tashmja dhe e ardhmja e Fondit të Sigurimeve Shëndetësore në Kosovë”, në të cilën ekspertë vendorë dhe ndërkombëtarë, kanë shprehur pikëpamjet dhe ndarë përvojat e tyre lidhur me implementimin e skemës së sigurimeve shëndetësore.

Duke përshëndetur pjesëmarrësit në këtë punëtori, Ministri i Shëndetësisë, Imet Rrahmani, ka folur për përgatitjet që deri më tash janë bërë nga ana e MSh-së lidhur me skemën e sigurimeve shëndetësore në Kosovë.

Ai ka thënë se pas miratimit të Rregullores së Agjensionit të Financimit të Shëndetësisë; themelimit të Këshillit Përgatitor për themelimin e Fondit, hartimit të Udhëzimit Administrativ për mbledhjen e premiumeve; përcaktimit të listës së shërbimeve jo-spitalore dhe atyre spitalore, MSh pret që në pjesën e dytë të vitit të fillohet me mbledhjen e kontributeve sikur e parasheh ligji..

Lidhur me përvojat sllovene dhe ato ndërkombëtare në fushën e sigurimeve shëndetësore ka folur ish-Ministri i Shëndetësisë dhe ish-drejtori i Fondit të Sigurimeve Shëndetësore në Slloveni, dr. Dorjan Marushiq; për përvojat austriake ka folur eksperti Rudolf Linzati, ndërkohë që këshilltari i Ministrit Imet Rrahmani për Sigurime Shëndetësore, Husein Reka, ka treguar përvojat e tij në implementimin e skemës së sigurimeve shëndetësore në Katar për vendosjen e transparencës në mbrojtjen shëndetësore.

Për statusin aktual të Fondit të Sigurimeve Shëndetësore në Kosovë, rezultatet dhe sfidat si dhe statusin e projekteve të Teknologjisë Informative, kanë folur zyrtarë të Ministrisë së Shëndetësisë nga Agjensioni i Financimit të Shëndetësisë dhe Departamenti i Sistemit të Informimit Shëndetësor.

Në ditën e dytë të konferencës, është punuar në grupe në draft -Planin e aksionit do të ndërmirren në drejtim të fillimit të mbledhjes së premiumeve dhe funksionalizimit të skemës së sigurimeve shëndetësore në Kosovë.