Mos i shpenzoni 11 milionë euro për zgjedhje të reja, …ndërtoni një qendër spitalore moderne!

Shkruan: Kushtrim Kadriu

Mos i shpenzoni 11 milionë euro për zgjedhje të reja, ndërkohë qytetarët shpenzojnë deri në 150 milionë euro për shërim jashtë vendit ndërtoni një qendër spitalore moderne!

Organizimi i një procesi të ri zgjedhor parlamentar mund t’i kushtojë Kosovës rreth 11 milionë euro vetëm për shpenzimet e Komisionit Qendror të Zgjedhjeve. Këtu nuk përfshihen shpenzimet e subjekteve politike, paratë që kandidatët investojnë gjatë fushatës dhe, mbi të gjitha, koha dhe energjia institucionale që humben sa herë që vendi hyn në një cikël të ri zgjedhor.

Po bëhet gjithnjë e më e qartë se Kosova mund të shkojë përsëri drejt zgjedhjeve. Megjithatë, një proces i ri zgjedhor, në rrethanat aktuale, do të ishte i kushtueshëm, lodhës për qytetarët dhe dëshmi e paaftësisë së politikës për të ndërtuar marrëveshje dhe institucione të qëndrueshme.

Kosova ka nevoja shumë më urgjente. Ajo ka nevojë për një spital modern, pajisje të avancuara mjekësore dhe qendra të specializuara, ku qytetarët të diagnostikohen dhe të trajtohen me dinjitet dhe siguri.

Çdo vit, shumë familje kosovare detyrohen të kërkojnë trajtim në Turqi, Shqipëri dhe vende të tjera, sepse sistemi ynë shëndetësor ende nuk i ka kapacitetet e nevojshme për diagnostikimin dhe trajtimin e një numri të sëmundjeve të rënda. Për disa familje, kjo nënkupton shitjen e pronës, marrjen e kredive bankare ose thirrjet publike për ndihmë. Sipas vlerësimeve të publikuara, qytetarët e Kosovës shpenzojnë rreth 120–150 milionë euro në vit për trajtime shëndetësore jashtë vendit.

Natyrisht, 11 milionë eurot e një procesi zgjedhor nuk mjaftojnë vetë për ndërtimin dhe funksionalizimin e një spitali bashkëkohor. Por krahasimi nxjerr në pah një problem më të thellë: shteti vazhdon të shpenzojë para dhe energji për pasojat e krizave politike, ndërsa investimet strategjike në shëndetësi shtyhen nga viti në vit. Me planifikim afatgjatë dhe orientim të qëndrueshëm të buxhetit, Kosova mund të ndërtojë kapacitete që shpëtojnë jetë dhe zvogëlojnë varësinë nga spitalet jashtë vendit.

Politika kosovare duhet të dalë nga llogoret partiake. Është koha që liderët politikë të ulen, të reflektojnë dhe të marrin vendime në interes të qytetarëve, jo vetëm sipas kalkulimeve të ngushta të subjekteve të tyre.

Paratë publike mblidhen nga taksat tona. Prandaj, nuk është e drejtë që ato të shpenzohen vazhdimisht për procese të përsëritura zgjedhore vetëm sepse politika nuk arrin të krijojë marrëveshje dhe institucione funksionale. Demokracia kërkon zgjedhje, por kërkon edhe përgjegjësi pas zgjedhjeve. Vota e qytetarit nuk duhet të shndërrohet në mekanizëm për të mbuluar dështimin e politikës për të bashkëpunuar.

Kosovës nuk i mungojnë zgjedhjet. I mungojnë përgjegjësia, kompromisi dhe vendimmarrja në shërbim të qytetarit.

Në vend të një pale tjetër zgjedhjesh, politika duhet të ndërtojë marrëveshje, ndërsa shteti duhet të ndërtojë një spital modern dhe të investojë aty ku mbrohen jeta, shëndeti dhe dinjiteti i qytetarëve. /2LONLINE/