Mobilizohen për shërbime sa më të shpejta për bashkatdhetarët

/2L ONLINE/ – Drejtoria e Administratës komunale ka mbajtur një konferencë për shtyp në të cilën u raportua për punën 5 mujore të kësaj drejtorie. Fillimisht zv. kryetari i komunës Hasan Aliu ka njoftuar gazetarët me aktivitetet aktuale të komunës së Vitisë, e njëkohësisht për angazhimet në mobilizimin e sektorëve të ofiqarisë për shërbime sa më të shpejta për bashkatdhetarët në kohën e pushimeve verore.

Aliu ka theksuar se edhe këtë vit, janë bërë gjitha përgatitjet e duhura për ofrim sa më të mirë të shërbimeve, duke u shpreh të gatshëm edhe në zgjatjen e orarit të punës në sektorin e ofiqarisë.

Ndërkaq drejtori i Administratës komunale Isak Sadiku, ka theksuar se kjo drejtori si gjithnjë është e përkushtuar në ofrimin sa më të mirë të shërbimeve ndaj qytetarëve.

Duke folur për punën 5 mujore të kësaj drejtorie, Sadiku ka thënë se për këtë periudhë janë lëshuar rreth 18.500 dokumente, ndërsa ka përmendur edhe vështirësitë siç është mungesa e ekstrakteve të lindjes, që ka ndikuar paksa tek qytetarët, megjithëse ky është një problem në nivel vendi.

Në këtë konferencë për shtyp, zv. kryetari i komunës Hasan Aliu ka bërë thirrje qytetarëve që të kryejnë obligimet që kanë ndaj komunës, me qëllim të rritjes së inkasimit të tatimit në pronë, e cila do të ndikoj pozitivisht edhe në rritjen e investimeve nëpër lokalitete./2L ONLINE/