MKRS: Marrëveshje bashkëpunimi me Universitetin e Prishtinës
Ministria për Kulturë, rini e Sport (MKRS), ka bërë me dije se gjatë vitit të kaluar kanë filluar me shënimin e ditëve të rëndësishme kulturore përmes Kalendarit Kulturor. Për zhvillimin dhe zbatimin e këtyre aktiviteteve tash është nënshkruar marrëveshje bashkëpunimi me Universitetin e Prishtinës “Hasan Prishtina”, Fakultetin e Arteve.
Sipas MKRS-së, ky marrëveshje parasheh thellimin e bashkëpunimit mes Ministrisë së Kulturës dhe UP në ideimin, konceptimin, realizimin, promovimin dhe zhvillimin e Kalendarit Kulturor të Ministrisë së Kulturës me të gjitha datat përkatëse në bazë vjetore.
Marrëveshja u nënshkrua nga Ministri i Kulturës, Hajrulla Çeku, rektori i UP-së, Qerim Qerimi dhe dekani i Fakultetit të Arteve, Hazir Haziri.
“Kjo do të jetë një mundësi e mirë edhe për studentët që të angazhohen në organizimin e ngjarjeve kulturore dhe po ashtu të marrin pjesë në to”, thuhet në njoftimin e MKRS-së. /2LONLINE/