Misioni i EULEX-it është i përfshirë në hetimin e rasteve të terrorizmit

Misioni i EULEX-it është i përfshirë në hetimin e rasteve të terrorizmit në Kosovë që kanë elemente fetare. Por këto raste nuk ndërlidhen me arrestimet e fundit e të cilat kanë tërhequr vëmendje të madhe në opinion, ka thënë shefi në largim i EULEX-it, Bernd Borchardt.

Në një intervistë dhënë “Kohës Ditore”, gjermani i cili shërbeu dy vite në krye të misionit të EULEX-it, ka potencuar se terrorizmi që nxitet nga aspekti fetar ose një mënyrë tjetër është kërcënim shumë i madh jo vetëm për Kosovën, por për gjithë Evropën.

Duke folur për punën e misionit evropian në Kosovë, gjermani Borchard ka treguar se janë 372 aktgjykime që ndërlidhen me rastet e korrupsionit dhe krimit të organizuar. Kurse për “peshqit e mëdhenj” Borchard ka shtuar se posa të sigurohen provat e mjaftueshme do të ngrihen aktakuza edhe ndaj tyre.