Mirënjohje për Agon Behlulin, sjellë donacion për Gjimnazin “Zenel Hajdini”

“Shkolla jonë pati kënaqësinë të mirëpresë Agon Behlulin, bashkatdhetarin tonë me origjinë nga Gjilani, i cili prej një dekade është mbështetës i vazhdueshëm i shkollës sonë. I lindur dhe i rritur në Zvicër, Agoni, përmes përkushtimit, vullnetit të mirë dhe mbështetjes së vazhdueshme, ka dhënë një kontribut të çmuar në përmirësimin e kushteve për nxënësit tanë. Si menaxher i resurseve në një gjimnaz kantonal në Cyrih, ai e njeh nga afër rëndësinë e një mjedisi të përshtatshëm dhe të pajisur mirë për mësim”, thuhet në njoftimin zyrtaf të Gjimnazit “Zenel Hajdini”, Gjilan.

Gjatë këtyre dhjetë viteve, mbështetja e tij ka qenë e vazhdueshme dhe konkrete, duke përfshirë banka, karrige, projektorë, mjete didaktike dhe pajisje të tjera të nevojshme për procesin mësimor.

“Edhe kësaj radhe, Agoni dëshmoi se përkushtimi i tij ndaj shkollës sonë nuk njeh distancë. Donacioni i radhës përfshin kompjuterë të modeleve të fundit, printerë dhe pajisje të tjera teknologjike, të cilat do të ndikojnë drejtpërdrejt në krijimin e kushteve më të mira për mësimdhënie dhe mësimnxënie”, thuhet tutje në njoftim.

Sipas drejtuesve të shkollës, kontributi i tij është dëshmi e qartë se dashuria për vendlindjen dhe kujdesi për brezat e rinj shprehen përmes veprave konkrete. Mbështetja e Agonit është më shumë se një donacion material është një investim në dije, në arsim dhe në të ardhmen e nxënësve tanë.

“Faleminderit nga zemra, Agon Behluli! Mirënjohja jonë për ty është e madhe. Urojmë që shembulli yt të frymëzojë edhe të tjerë që të kontribuojnë në zhvillimin e arsimit dhe në krijimin e mundësive më të mira për gjeneratat e reja. Faleminderit që për dhjetë vjet radhazi je pranë shkollës sonë dhe nxënësve tanë”, thuhet në fund të njoftimit të Gjimnazit “Zenel Hajdini”, Gjilan.  /2LONLINE/