MINTI dhe Komuna e Kamenicës diskutojnë për zhvillimin ekonomik dhe zonat industriale

Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, priti në takim kryetarin e Komunës së Kamenicës, Kadri Rahimaj, i cili shoqërohej nga deputeti i zgjedhur i Kuvendit të Kosovës, Ilir Kërçeli, dhe drejtori për Zhvillim Ekonomik dhe Diasporë në Komunën e Kamenicës, Edon Dermaku.

Gjatë takimit u diskutua për zhvillimin ekonomik lokal, mundësitë e thellimit të bashkëpunimit ndërmjet Komunës së Kamenicës dhe Ministrisë së Industrisë, Ndërmarrësisë, Tregtisë dhe Inovacionit, si dhe për sfidat me të cilat përballet kjo komunë.

Në takim u theksua se, nga perspektiva e zhvillimit ekonomik, ndarja e Kamenicës dhe Ranillugut gjatë procesit të decentralizimit ka krijuar vështirësi në administrimin dhe menaxhimin e zonave industriale. Në këtë drejtim, u vlerësua se riorganizimi dhe funksionalizimi i tyre mbetet një domosdoshmëri për të nxitur investimet, prodhimin dhe zhvillimin ekonomik të Komunës së Kamenicës.

Ministrja Kusari-Lila vlerësoi qasjen proaktive të kryetarit Rahimaj në adresimin e këtyre sfidave dhe në gjetjen e zgjidhjeve të qëndrueshme për komunën.

Ajo shprehu gatishmërinë për bashkëpunim të ngushtë institucional dhe për mbështetjen e projekteve që synojnë forcimin e infrastrukturës industriale, krijimin e kushteve më të favorshme për zhvillimin e bizneseve dhe hapjen e vendeve të reja të punës në Komunën e Kamenicës. /2LONLINE/