Ministrja Kusari-Lila: Matjet e sakta garantojnë tregti të ndershme dhe mbrojtje për fermerët

Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, së bashku me kryetarin e Komunës së Gjilanit, Alban Hyseni, vizituan procesin e verifikimit të peshoreve gjatë sezonit të korrje-shirjeve të grurit, me qëllim garantimin e matjeve të sakta dhe mbrojtjen e fermerëve dhe konsumatorëve.

Gjatë vizitës u verifikua peshorja 60-tonëshe në Mullirin “Alia Commerc”, në pronësi të Ridvan Rrahmanit, në fshatin Cërnicë të Komunës së Gjilanit.

Procesi i verifikimit konfirmoi se peshorja funksionon brenda standardeve të lejuara metrologjike, ndërsa pas përfundimit të kontrollit u vendos edhe shenja zyrtare e verifikimit.

Ministrja Kusari-Lila theksoi se këto kontrolle kanë rëndësi të veçantë për mbrojtjen e konsumatorëve dhe fermerëve, pasi garantojnë matje të sakta gjatë pranimit dhe deponimit të grurit në mullinj për bluarje.

Ajo shtoi se verifikimi i rregullt i mjeteve matëse kontribuon në zhvillimin e një tregtie të ndershme dhe në forcimin e besimit të qytetarëve në proceset e matjes. /2LONLINE/