Ministria përkrah integrimin dhe pjesëmarrjen e të rinjve të komuniteteve

Zëvendësministrja e Kulturës, Rinisë dhe Sportit, Elfete Shabani, priti sot në takim përfaqësuesen e UNICEF Innovations Lab Kosovo, Nita Zeqiri dhe përfaqësues të Rrjetit të Avokuesve të Rinj.

Në takim u bisedua rreth pjesëmarrjes së të rinjve nga komunitetet pakicë, me theks të komuniteteve RAE në aktivitete të ndryshme rinore.

Zëvendësministrja Shabani e vlerësoi lartë punën e Rrjetit të Avokuesve të Rinj dhe falënderoi përfaqësuesen e UNICEF Innovations Lab Kosovo, Nita Zeqiri për punën e tyre që po realizojnë në përkrahjen e të rinjve.

Gjithashtu, Shabani foli për projektet e Ministrisë, që në fokus kanë pasur aktivitetet rinore dhe punën vullnetare për të rinjtë e komuniteteve dhe se të rinjtë e komuniteteve të do të vazhdojnë të përkrahen në të gjitha aspektet.

Ndërkaq, Zeqiri theksoi se bëjnë përkrahjen e të rinjve në aktivitetet e tyre, veçanërisht mbështesin punën e Rrjetit të Avokuesve të Rinj.

Kurse përfaqësuesit e këtij rrjeti folën rreth qëllimit të themelimit të tij, që si objektiv kryesor kanë mbështetjen dhe mbrojtjen e çështjeve që i preokupojnë komunitetin RAE dhe përfshirjen e tyre në aktivitete. Të rinjtë nga ky rrjet kërkuan ndër të tjera që t’u mundësohet edhe kryerja e pjesës praktike në institucionin e MKRS-së.

Zëvendësministrja Shabani ishte e shoqëruar nga drejtori i Departamentit të Rinisë, Xhevat Bajrami, i cili theksoi se ndër prioritet e MKRS-së është zhvillimi dhe avancimi i rinisë, ku në fokus të jenë edhe të rinjtë nga komunitetet joshqiptare dhe se MKRS, gjegjësisht Departamenti i Rinisë, është derë e hapur për të rinjtë e këtyre komuniteteve.