Ministri Zharku nënshkruan Udhëzimet Administrative nr. 06/2017 dhe nr. 07/2017
Ministri i Infrastrukturës, Lutfi Zharku ka nënshkruar Udhëzimet Administrative (MI) nr. 06/2017 për rregullat për qerre dhe makina të punës, si dhe nr. 07/2017 për rregullat dhe kushtet për lëvizjen e sajave dhe mjeteve të pajisura me rrëshqitëse.
Udhëzimi Administrativ nr. 06/2017 përcakton rregullat dhe kushtet për drejtimin e mjetit të tërhequr me kafshë (qerres), si dhe kufizimet dhe ndalimet për qarkullimin e makinave të punës, me qëllim të rritjes së sigurisë në trafikun rrugor.
Dispozitat e këtij Udhëzimi Administrativ zbatohen nga personat e autorizuar, të cilët bëjnë rregullimin dhe mbikqyrjen e trafikut, personat që drejtojnë qerren, si dhe shoferët e makinave të punës.
Ndërsa me Udhëzimin Administrativ nr. 07/2017 përcaktohen rregullat dhe kushtet për lëvizjen e sajave dhe mjeteve tjera rrëshqitëse, me qëllim të rritjes së sigurisë në trafikun rrugor.
Dispozitat e këtij Udhëzimi Administrativ zbatohen nga personat e autorizuar, të cilët bëjnë rregullimin dhe mbikqyrjen e trafikut, si dhe personat që drejtojnë sajat dhe mjetet tjera rrëshqitëse.
Qarkullimi i sajave dhe mjeteve të tjera rrëshqitëse në rrugë publike lejohet nëse rruga është e mbuluar me borë ose në rrugë me akull.
Të gjitha udhëzimet administrative të nënshkruara nga ministri Zharku mund t’i gjeni dhe shkarkoni nga web faqja e Ministrisë së Infrastrukturës: http://www.mi-ks.net