Ministri Rrahmani priti Sindikatën e Policisë së Kosovës

Ministri i Shëndetësisë Imet Rrahmani me bashkëpunëtorë priti sot në takim Kryetaren e Sindikatës së Policisë së Kosovës, znj. Valbona Kamberi – Hoxha, të shoqëruar nga Nënkryetari z. Shaban Tasholli. Në takim u bisedua për gjendjen e shëndetësisë në përgjithësi me theks të veçantë për sigurimet shëndetësore.

Ministri Rrahmani ka njoftuar Sindikatën e Policisë për punën që është duke u bërë në përgjithësi në sektorin e shëndetësisë, me qëllim të përmirësimit të shërbimeve shëndetësore në vend.

“Ministria e Shëndetësisë do të jetë e gatshme të filloj brenda këtij viti me mbledhjen e premiumeve për sigurimin shëndetësor, dhe se me krijimin e Fondit të Sigurimeve Shëndetësore do të rriten edhe kapacitetet profesionale dhe infrastrukturore në shëndetësi që do të reflektojnë në cilësinë më të mirë të shërbimeve shëndetësore për të gjithë qytetarët e vendit”, tha ministri Rrahmani.

Përfaqësuesit e Sindikatës kanë vlerësuar lartë bashkëpunimin mes MSh-së dhe Sindikatës së Policisë dhe kanë mirëpritur lajmin për fillimin e mbledhjes së premiumeve për sigurimin shëndetësor gjatë këtij viti, duke ofruar përkrahje në këtë aspekt me propozime konkrete për fuqizimin e Fondit të Sigurimit Shëndetësor.