Ministri Rrahmani dhe shefja e UNICEF-it në Kosovë diskutojnë projektet e përbashkëta në shëndetësi

Ministri i Shëndetësisë Imet Rrahmani priti sot në takimin shefen e Zyrës së UNICEF-it në Kosovë, znj. Laila Omar Gad. Në këtë takim u vlerësua bashkëpunimi i mirë midis Ministrisë dhe UNICEF-it në Kosovë në realizimin e shumë projekteve të cilat kanë të bëjnë me përmirësimin e shëndetit të nënës dhe fëmijës dhe avansimin e shërbimeve shëndetësore.

Ministri Rrahmani dhe znj. Gad biseduan në mënyrë të veçantë për projektin e vizitave shëndetësore shtëpiake që pas disa komunave në Dukagjin do të shtrihet edhe në rajonin e Gjilanit; projektin për realizimin e objektivave të Mijëvjeçarit që lidhen me shëndetësinë dhe projektet e përbashkëta që Ministria dhe UNICEF-i do t’i realizojnë gjatë vitit 2016 dhe vitit 2017.

Ministri Rrahmani siguroi shefen e UNICEF-it në Kosovë se kjo ministri do të jetë e përkushtuar për fuqizimin e partneritetit, që deri tash ka rezultuar shumë i suksesshëm, ndërkohë që shefja e UNICEF-it tha se kjo organizatë do të vazhdojë ta mbështes shëndetësinë kosovare në përmbushjen e objektivave të saj që synim kanë përmirësimin e shëndetit dhe mirëqenies së qytetarëve të Kosovës.