Ministri në detyrë Xhelal Sveçla: Xhandarmëria e Republikës së Kosovës po bëhet

Ministri në detyrë i Ministrisë së Punëve të Brendshme, Xhelal Sveçla, ka bërë me dije se ka nënshkruar vendim për themelimin e grupit punues, i cili synon të analizojë dhe propozojë modalitetet për funksionimin e Xhandarmërisë së Kosovës si agjencion i MPB-së.

“Si Ministër i Punëve të Brendshme sot kam nënshkruar themelimin e grupit punues i cili do të bëj analizimin dhe propozimin e modaliteteve për funksionimin e Xhandarmërisë së Republikës së Kosovës, si Agjencion i Ministrisë së Punëve të Brendshme”, ka thënë Sveçla.

Sipas tij, Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufinjve, integritetit dhe sovranitetit tonë territorial, mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike.

“Xhandarmëria e Republikës së Kosovës do të forcojë ndjeshëm kapacitetin shtetëror për parandalim, menaxhim dhe neutralizim të kërcënimeve që cënojnë sigurinë e qytetarëve dhe integritetin territorial të vendit tonë”, ka thënë Ministri në detyrë i Ministrisë së Punëve të Brendshme, Xhelal Sveçla.  /2LONLINE/