Ministri Maqedonci priti në takim nënkolonelin britanik Mike Butler

Ministri në detyrë i Mbrojtjes, Ejup Maqedonci priti në takim nënkolonelin Mike Butler, këshilltar bilateral i Mbretërisë së Bashkuar, i cili vepron pranë Ministrisë së Mbrojtjes së Republikës së Kosovës.

Mbretëria e Bashkuar ka qenë një ndër partnerët më të rëndësishëm dhe më mbështetës të Republikës së Kosovës në çdo etapë të shtetndërtimit të saj. Kontributi i saj ka qenë i gjithanshëm – nga ndihma në ngritjen e kapaciteteve humane, logjistike dhe ligjore, deri te përkrahja e fuqishme në sektorin e sigurisë dhe mbrojtjes.

Gjatë takimit u diskutua për ecurinë e aktiviteteve të përbashkëta që po zhvillohen në kuadër të planit bilateral të bashkëpunimit ndërmjet dy vendeve, me theks të veçantë në operacionin “Interflex”, i cili përfaqëson angazhimin më të rëndësishëm aktual të Forcës së Sigurisë së Kosovës jashtë vendit.

Ministri Maqedonci dhe nënkoloneli Butler vlerësuan lart profesionalizmin dhe angazhimin e pjesëtarëve të FSK-së, ndërsa diskutuan edhe për mundësinë e zgjerimit të bashkëpunimit në fusha të reja, me qëllim që FSK të vazhdojë të jetë një kontribuuese aktive për paqe dhe siguri në nivel ndërkombëtar.

Ministri Maqedonci falenderoi Mbretërinë e Bashkuar për mbështetjen e vazhdueshme dhe partneritetin e fuqishëm në ndërtimin e kapaciteteve tona mbrojtëse. /2LONLINE/