Ministri Maqedonci priti në takim komandantin e anijes amfibe zbarkuese USS Pearl Harbor, Alban Dervishi

Ministri i Mbrojtjes, Ejup Maqedonci, së bashku me zëvendësministrat e Mbrojtjes, Gegë Lleshin dhe Enis Kervan, sot u takuan me Komandantin e anijes amfibe zbarkuese USS Pearl Harbor, Alban Dervishi, oficer i Forcave Detare të Shteteve të Bashkuara të Amerikës me prejardhje shqiptare.

Gjatë takimit, ministri Maqedonci vlerësoi lart përkushtimin, profesionalizmin dhe suksesin e Komandant Dervishit, duke theksuar se ai përfaqëson një shembull të fuqishëm të rolit gjithnjë në rritje të shqiptaro-amerikanëve në institucionet e sigurisë dhe mbrojtjes së SHBA-së. Ai u cilësua si një figurë që mishëron vlerat e shërbimit, të përgjegjësisë dhe të lidershipit.

Nga ana e tij, Komandant Dervishi tha se ndihet i nderuar që ka vizituar Kosovën duke vlerësuar arritjet e vendit, veçanërisht në zhvillimin dhe avancimin e sistemit të mbrojtjes.

Ministri Maqedonci e falënderoi për vizitën dhe ritheksoi mirënjohjen e Republikës së Kosovës për mbështetjen e vazhdueshme dhe të palëkundur të Shteteve të Bashkuara të Amerikës, duke nënvizuar se SHBA-ja mbetet aleati strategjik dhe i pazëvendësueshëm i vendit tonë. /2LONLINE/