Ministri Maqedonci po merr pjesë në Panairin Ndërkombëtar të Industrisë së Mbrojtjes në Stamboll

Ministri në detyrë i Mbrojtjes, Ejup Maqedonci, po merr pjesë në Panairin Ndërkombëtar të Industrisë së Mbrojtjes (IDEF) që ka nisur sot në Stamboll.

Me këtë rast, ministri Maqedonci ka zhvilluar takime me përfaqësues të kompanive të specializuara në prodhimin e pajisjeve ushtarake, me qëllim të thellimit të bashkëpunimit dhe eksplorimit të mundësive për furnizimin e ushtrisë së Kosovës me teknologji moderne dhe efikase.

Ai theksoi se ky panair përfaqëson një nga ngjarjet më të rëndësishme në fushën e mbrojtjes dhe sigurisë, duke mbledhur figura të larta shtetërore të Turqisë, ministra të mbrojtjes nga shtetet anëtare të NATO-s dhe vende partnere nga e gjithë bota.

“Pjesëmarrja në këtë panair ofron një platformë të vlefshme për avancimin e bashkëpunimit ndërkombëtar dhe zhvillimin e mëtejshëm të kapaciteteve mbrojtëse të Republikës së Kosovës”, u shpreh ministri Maqedonci.

Ky angazhim përfaqëson një hap konkret drejt përmirësimit të kapaciteteve logjistike dhe operacionale të Forcës së Sigurisë së Kosovës, në funksion të forcimit të sigurisë kombëtare përmes investimeve strategjike dhe bashkëpunimit me partnerë ndërkombëtarë. /2LONLINE/