Ministri Maqedonci, folës në panelin me temë: “Impakti financiar i Sigurisë Kibernetike – investim apo shpenzim i domosdoshëm”

Ministri i Mbrojtjes në detyrë, Ejup Maqedonci, mori pjesë si folës në panelin me temën “Impakti financiar i Sigurisë Kibernetike – investim apo shpenzim i domosdoshëm”.

Në fjalën e tij, ministri Maqedonci theksoi se siguria kibernetike duhet trajtuar jo thjesht si shpenzim, por si investim strategjik në të ardhmen, që garanton mbrojtjen e infrastrukturës kritike, ruajtjen e të dhënave, funksionimin e institucioneve dhe besimin publik në sistemet digjitale.

“Çdo euro e investuar në mbrojtjen kibernetike është investim në stabilitet, zhvillim ekonomik dhe siguri kombëtare”, tha mes tjerash ai.

Duke e konsideruar sigurinë kibernetike si kërcënim real dhe permanent, ministri theksoi se Qeveria e Republikës së Kosovës, në bashkëpunim të ngushtë ndërinstitucional me Forcën e Sigurisë së Kosovës, ka ndërmarrë hapa konkretë drejt forcimit të kapaciteteve mbrojtëse të vendit.

Më tej, ai rikujtoi se siguria kibernetike është përfshirë si pjesë integrale në Strategjinë e Mbrojtjes së Republikës së Kosovës, si dhe në Strategjinë për Mbrojtje Kibernetike të Ministrisë së Mbrojtjes dhe FSK-së.

Në këtë kuadër, ministri përmendi se në mars të vitit të kaluar është themeluar Qendra Trajnuese për Siguri Kibernetike, si dhe është formuar Njësia Kibernetike në kuadër të FSK-së – dy nisma kyçe që dëshmojnë përkushtimin institucional për zhvillimin e kapaciteteve profesionale, teknike dhe operacionale për mbrojtjen e vendit në hapësirën digjitale.

Në përmbyllje të fjalës së tij, ministri Maqedonci potencoi se forcimi i sigurisë kibernetike nuk është vetëm detyrim institucional, por edhe domosdoshmëri kombëtare për garantimin e një të ardhmeje të sigurt, të qëndrueshme dhe të mbrojtur për qytetarët dhe vendin tonë. /2LONLINE/