Ministri i FSK-së Haki Demolli priti ambasadorin e SHBA-së, Greg Delaw

Ministri i FSK-së, z. Haki Demolli së bashku me komandantin e FSK-së, gjenerallejtënant Rrahman Rama, pritën sot në një takim ambasadorin e Shteteve të Bashkuara të Amerikës (SHBA), z. Greg Delawie.

Fillimisht, ministri Demolli falënderoi ambasadorin Dellawie për ndihmën e vazhdueshme që Shtetet e Bashkuara të Amerikës kanë dhënë ndër vite dhe po vazhdojnë të japin për ngritjen profesionale të FSK-së, siç është bashkëpunimi me Gardën Kombëtare të Ajovës.

Një falënderim të veçantë ministri Demolli i shprehu ambasadorit Delawie, lidhur me kërkesën e Kongresit Amerikan që të fillojnë përgatitjet që Kosova të hyjë në Programin e Partneritetit për Paqe (PfP), në kuadër të NATO-s.

Gjatë takimit ministri Demolli dhe ambasadori Delawie biseduan edhe për zhvillimet e përgjithshme në Ministri, me theks të veçantë për zhvillimet rreth procesit të transformimit të FSK-së.

Me këtë rast, ambasadori i SHBA-së, z. Delawie tha se Shtetet e Bashkuara të Amerikës do të vazhdojnë ta përkrahin procesin e transformimit të FSK-së.

Gjithashtu, ambasadori Greg Delawie shprehu kënaqësinë për bashkëpunimin e shkëlqyeshëm të deritashëm në mes dy shteteve, si dhe bashkëpunimin e FSK-së me Gardën Kombëtare të Ajovës. Ai premtoi vazhdimin e bashkëpunimit dhe ndihmën e pakursyer edhe në të ardhmen për ta ndihmuar Forcën e Sigurisë së Kosovës drejt profesionalizimit të saj.

Në takim morën pjesë edhe shefi i kabinetit të ministrit z. Latif Leka, atasheu i Mbrojtjes në Ambasadën e SHBA-ve, në Kosovë, koloneli Anthony Butts dhe Michael Polyak.