Ministri i FSK-së Haki Demolli homazhe në Memorialin e Reçakut

Në 17-vjetorin e Masakrës së Reçakut, të kryer nga forcat ushtarake okupuese serbe ndaj civilëve shqiptarë, sot për vizitë ishte një delegacion i Ministrisë së FSK-së dhe Forcës së Sigurisë së Kosovës (FSK) i kryesuar nga Ministri Haki Demolli e ku merrnin pjesë; zëvendësministrat: Fadil Gashi dhe Muhamet Latifi, komandanti i FSK-së, gjenerallejtënant Rrahman Rama, sekretari i Përgjithshëm i MFSK-së, z. Shkëlzen Sylaj, gjeneralët: Bashkim Jashari, Nazmi Brahimaj, Gëzim Hazrolli, zyrtarë dhe oficerë tjerë të lartë të FSK-së.

Me këtë rast, ministri Demolli dhe gjeneral Rama në Memorialin e Reçakut në shenjë nderimi vendosën lule të freskëta për ta. Ministri Demolli më pastaj, vizitoi edhe varrezat e martirëve, ku takoi familjarët e të rënëve të Reçakut, për t’u shprehur ngushëllimet dhe njëkohësisht krenarinë për ta. Gjaku i martirëve të Reçakut së bashku me gjakun e gjithë dëshmorëve të rënë u bë themel i Lirisë dhe Shtetit të Pavarur të Kosovës.