Ministri Haki Demolli dhe Komandanti i Forcës së Sigurisë së Kosovës(FSK), gjenerallejtënant Rrahman Rama morën pjesë në inaugurimin e urës të cilën në kohë rekord e ka montuar gjatë këtyre ditëve Batalioni i Xhenios së FSK-së për nevoja të Manastirit të Deçanit, popullatës lokale atje si dhe trupave të KFOR-it gjatë patrullimeve në zonë.
Batalioni i Xhenios i FSK-së me vendim të Ministrit, Haki Demolli dhe Urdhër të Komandantit, gjeneral Rrahman Ramës ka qenë e angazhuar në implementimin e këtij projekti që nga 15 qershori e deri më 3 korrik 2015. Në këtë projekt kanë punuar gjithsejtë 23 pjesëtarë të FSK-së. Vlen të theksohet se i terë materiali i urës ka qenë donacion i dhuruar nga Kontingjenti italian i KFOR-it e gjithashtu edhe trajnimi dhe përgatitje e pjesëtarëve për të montuar këtë model të urës.
Kohë më parë Kontingjenti italian i KFOR-it në Pejë pati drejtuar një kërkesë ministrit të FSK-së Haki Demollit që nëpërmjet Komandantit të FSK-së të angazhojë Batalionin e Xhenios të FSK-së të përgatitet dhe të kryej vendosjen e urës në lokacionin e caktuar paraprakisht. Për këtë qëllim, Kontingjenti ushtarak italian i KFOR-it pati ndarë si donacion skeletin e urës si dhe trajnimin për pjesëtarët që do të punonin në vendosjen e saj.
Në ceremoninë e inaugurimit sot, morën pjesë edhe kryetari i Komunës së Deçanit, Rasim Selmanaj, komandanti i KFOR-it. Gjeneral major Francesco Paolo Figliuolo, klerikët fetar të Manastirit si dhe personalitete tjera vendore dhe ndërkombëtare.
Përpos ndihmës për përmirësimin e cilësisë së jetës, qëllimi i projektit është edhe zgjerimi i bashkëpunimit me KFOR-in, autoritetet civile si dhe institucionet e vendit në bazë të misionit që aktualisht ka Forca e Sigurisë së Kosovës.