Ministri Agani bisedon për shëndetësinë me Kryetarin e Komunës së Kamenicës

(2LONLINE) – Ministri i Shëndetësisë së Republikës së Kosovës Ferid Agani, priti sot Kryetarin e Komunës së Kamenicës Begzad Sinani, me të cilin u bisedua për nevojat e kësaj komune në sektorin e shëndetësisë.

Ministri Agani i premtoi Kryetarit Sinani, se do të angazhohet maksimalisht në shfrytëzimin e opsioneve të mundshme, për t’i dalë në ndihmë kësaj komune me nevojat që kanë në shëndetësi.

“Është e rëndësishme që Komuna të gjejë mënyrën më të mirë që të plotësoj nevojat e qytetarëve edhe për gjashtë mujorin e dytë të këtij viti, ngase me hyrjen në fuqi të Ligjit të Sigurimeve Shëndetësore dhe krijimin e Fondit të Sigurimeve Shëndetësore, do të krijohen kushtet për punësime të reja që do të ndikojnë drejtpërdrejtë në afrimin e shërbimeve shëndetësore më cilësore për qytetarët e vendit”, tha Agani.

Në takim u bisedua edhe për Ligjin e Kontrollit të Duhanit, për të cilin Kryetari Sinani, tha se në Komunën të cilën ai e drejton, është punuar mjaft për të respektuar këtë Ligj por, mbetet të bëhet ende në këtë drejtim./2lonline/