Mësojnë për sigurinë në komunikacion
(2LONLINE) – Në bashkëpunim me Policinë e Kosovës, përkatësisht stacionin e Policisë në Gjilan, Qendra e Kujdesit Ditor- PEMA se bashku me 20 fëmijë me aftësi të kufizuar kanë realizuar një aktivitet lidhur me sigurinë në komunikacionin rrugor.
Fëmijët fillimisht janë njoftuar me rregullat e komunikacionit në mënyrë teorike në ambientet e stacionin e Policisë-Gjilan e pastaj janë shoqëruar nga policët edhe në rrugë ku janë njoftuar drejtpërdrejt me rregullat në komunikacion, vendkalimet për këmbësore, semaforët etj si dhe në shenjë përkrahje të polices për respektimin e rregullave në komunikacion kanë shpërndarë fletushka për vetëdijesimin e qytetarëve për respektim e këtyre rregullave, duke bërë sensibilizimin e qytetarëve.
Festa Demiri-Koordinatore e kësaj qendre ka thënë se kjo qendër çdo ditë e më shumë po ka fëmijë që po bëhen pjesë e saj si pasojë e nevojës për një shërbim të tillë që i mundëson fëmijëve socializim, integrim dhe zhvillim të potencialeve, po ashtu po ka përkrahje edhe nga prindërit të cilët janë shumë të kënaqur për ardhjen e fëmijëve të tyre në marrjen e shërbimeve në Qendrën e Kujdesit Ditor-Pema, Gjilan.
“Ne shprehim mirënjohjen për bashkëpunimin nga ana e policisë, ku besojmë se përkrahja dhe aktivitetet e përbashkëta nuk do të ndalen. Ky nuk është aktiviteti i parë në komunitet që zhvillohet me këta fëmijë, qendra jonë edhe në të ardhmen do të përkrah e zhvilloj aktivitete të ngjashme”, ka thënë Demiri.
Qendra e Kujdesit ditor-Pema financohet nga Zyra e Komisionit Evropian, në bashkëpunim me Ministrinë e Punës dhe Mirëqenies Sociale në Kosovë dhe Fondacioni Medicor. /2lonline/