Me ushtrimin “Evakuimi 2015” u shënua Dita Ndërkombëtare për zvogëlimin e rrezikut nga fatkeqësitë
/2L ONLINE/ – Me rastin 13 Tetorit-Ditës Ndërkombëtare për zvogëlimin e rrezikut nga fatkeqësitë, në shkollën e mesme profesionale “Jonuz Zejnullahu” në Viti është mbajtur ushtrimi “Evakuimi 2015”, që kishte për qëllim ngritjen e shkathtësive dhe njohurive në fushën e kërkim shpëtimit, evakuimit dhe menaxhimit të situatave aksidentale.
Në këtë ushtrim që u organizua nga Drejtoria për Shërbime Publike dhe Siguri Emergjente, e ku nga afër i përcolli ato edhe kryetari i komunës Sokol Haliti, ishin pjesëmarrës përpos Njësisë së Zjarrfikjes edhe Shërbimi policor i Kosovës, Qendra e Mjekësisë familjare, Kryqi i kuq, ndërkaq ishin të përfshirë në ushtrim edhe nxënësit dhe personeli i shkollës teknike “Jonuz Zejnullahu”.
Drejtori i Drejtorisë së Shërbimeve Publike Nexhmedin Jakupi, ka thënë se me këtë ushtrim synojmë të koordinojmë dhe veprojmë brenda Ligjit për Fatkeqësitë natyrore, Udhëzimit administrativ për menaxhimin e integruar te situatave emergjente, si dhe Statutit dhe Rregulloreve Komunale.
Në takimin që u mbajt paraprakisht me stafin e shkollës, u fol për hapat që duhet të ndërmerren nga ana e personelit në rastet e fatkeqësive, si ato të zjarrit, po ashtu edhe tërmeteve të mundshme.
Para fillimit të ushtrimit, nëpër klasë u mbajt një ligjëratë e shkurtër në aspektin teorik për rregullat të cilat duhet ti respektojnë Pedagogët dhe nxënësit në rastet e emergjencave kur duhet të dilet jashtë objektit shkollor, në momentin ndodhjes së fatkeqësive kur ata janë në klasë.
Objektiv kryesor i këtij ushtrimi ishte menaxhimi i situatave aksidentale, koordinimi, udhëheqja dhe bashkërendimi i veprimeve nga niveli komunal, zhvillimi i Procedurave Standarde Operative, si dhe zhvillimi i rrjedhës së Informacionit. Nga pjesëmarrësit dhe organizatorët, ushtrimi i sotëm u vlerësua i suksesshëm dhe si shumë i nevojshëm në vetëdijesimin e nxënësve për rastet emergjente./2L ONLINE/
